Bakıdan Tiflisə yeni təklif

Tiflis heyvanxanasından qaçan vəhşilərin tapılıb xilas edilməsi üçün bütün köməkliyi göstərə bilərik.

Güclü daşqın nəticəsində Gürcüstanın paytaxtı Tiflisdə bir çox yerlər kimi heyvanxana da dağılıb. Dağıntılar nəticəsində zooparkda saxlanılan vəhşi heyvanlar qaçıb. Dağılan zoopark rəhbərliyi heyvanlarin böyük əksəriyyətinin boğularaq öldüyünü ehtimal edir. Hazırda həmin heyvanların axtarışlarına başlanılıb. Bir çox ölkələrin zooparklarından Tiflisə dəstək və kömək təklif olunub.

Bakı Zooloji Parkından da Gürcüstanda dağılmış zooparkın heyvanlarının tapılması və xilas edilməsi üçün təkliflər edilib. Bakı zooparkının direktoru Azər Hüseynov ANS PRESS-ə gürcüstanlı həmkarlarına hər cür köməklik göstərmək imkanlarının olduğunu bildirib. Onun sözlərinə görə, bununla bağlı Tiflis zooparkının direktoru ilə telefonla danışdığını və köməklik təklif etdiyini vurğulayıb.

"Bakı zooparkının təcrübəli həkimlərimiz, mütəxəsssilərimiz var. Heyvanların tapılması, onların tutulması üçün müasir avadanlıqlarımız və texnikalarımız var. Heyvanları sakitləşdirmək üçün lazım olan dərman vasitələri də yetərincədir. Bir sözlə, biz qonşu ölkənin heyvanxanasına yardım etmək imkanına malikik", - deyə Azər Hüseynov qeyd edib.

Bundan əlavə, Bakı zooparkında Tİflisdə yerləri dağılan heyvanları müvəqqəti saxlamaq üçün şəraitdə var. Azər Hüseynovun sözlərinə görə, bu baxımdan da Tİflis heyvanxanasının direktoruna köməklik təklif edilib.

"Təbii ki, bu təkcə mənim səlahiyyətim çərçivəsində olan məsələ deyil. Ölkə rəhbərliyi məsləhət görərsə, Gürcüstan tərəfindən müraciət gələrsə, təbii ki, biz hər cür köməkliyə hazırıq. Heyvanxanamızda qaçan vəhşilərin saxlanılması üçü hər bir şərait var. Biz öz köməkliyimizi təklif etmişik", - deyə Azər Hüseynov qeyd edib.