Azərbaycan 140-dan çox ölkəyə inkişaf yardımı göstərib

17.06.2026 16:15

Azərbaycan indiyədək 140-dan çox ölkəyə maliyyə, texniki və potensialın artırılması üzrə yardım göstərib. Bunu xarici işlər nazirinin müavini Yalçın Rəfiyev bildirib.

Onun sözlərinə görə, Azərbaycan donor fəaliyyəti çərçivəsində 44 ən az inkişaf etmiş ölkədən 43-nə, Afrikanın 54 ölkəsindən 53-nə və İslam Əməkdaşlıq Təşkilatına üzv 57 dövlətdən 51-nə dəstək verib.

Rəfiyev bildirib ki, bu geniş fəaliyyət Azərbaycanın dayanıqlı inkişafın yerli potensialın gücləndirilməsi, bilik və təcrübə mübadiləsi, eləcə də ölkələrin öz prioritetlərinə əsaslanan layihələrin dəstəklənməsi yolu ilə təmin olunmasına dair yanaşmasını əks etdirir.

Nazir müavini Azərbaycan Beynəlxalq İnkişaf Agentliyi ilə İslam İnkişaf Bankı arasında əməkdaşlığın genişləndiyini qeyd edib. Onun sözlərinə görə, tərəflər rəqəmsal innovasiya və İKT, səhiyyə və peşə təhsili, iqlim dayanıqlılığı və humanitar yardım sahələrində əməkdaşlığı inkişaf etdirirlər.

Rəfiyev bildirib ki, bu əməkdaşlıqda əsas diqqət Afrikaya, eləcə də Suriya, Əfqanıstan və digər həssas ölkələrə yönəlib.

O, həmçinin ASAN xidmətin təcrübəsinin beynəlxalq səviyyədə bölüşüldüyünü vurğulayıb və bu ilin əvvəlində Pakistanda ASAN Xidmət Mərkəzinin istifadəyə verilməsini mühüm mərhələ adlandırıb.

Rəfiyev qeyd edib ki, COP29 çərçivəsində Azərbaycan tərəfdaşları ilə birlikdə “Sülh, yardım və bərpa naminə iqlim fəaliyyəti üzrə Bakı Çağırışı”nı irəli sürüb. Bu təşəbbüsün əsas nəticələrindən biri iqlimə həssas ölkələri praktiki tərəfdaşlıq, texniki yardım, potensialın artırılması və layihə hazırlığı vasitəsilə dəstəkləmək üçün Bakı İqlim və Sülh Fəaliyyəti Mərkəzinin yaradılması olub.

Onun sözlərinə görə, mərkəzin məqsədi ölkələrin milli prioritetlərini iqlim və inkişaf maliyyəsini cəlb edə biləcək investisiyaya hazır layihələrə çevirməkdir.

Rəfiyev bildirib ki, Azərbaycan bu çərçivədə Qvineya-Bisau hökuməti ilə praktiki əməkdaşlığa başlayıb və yaxın vaxtlarda bu tərəfdaşlıq üzrə konkret nəticələr əldə olunacağı gözlənilir.