Axar.az xəbər verir ki, bu sözləri Bakıda Avropa İttifaqı-Azərbaycan Parlament Əməkdaşlıq Komitəsinin 15-ci iclasının yekununu şərh edən politoloq Elxan Şahinoğlu deyib. Siyasi şərhçi bildirib ki, Prezident İlham Əliyev bu məsələdə iki arqumentə əsaslanır:

"Birincisi, Aİ Azərbaycanın əsas ticarət tərəfdaşıdır. Azərbaycanın Avropanın enerji təhlükəsizliyində rolu artır. Buna nümunə olaraq TAP boru xəttini də göstərmək olar. İkincisi, Azərbaycan Aİ-yə üzv dövlətlərin üçdə biri ilə artıq strateji tərəfdaşlıq sənədi imzalayıb və ya qəbul edib. Buna baxmayaraq, Azərbaycan hələ də Aİ ilə strateji əməkdaşlıq sazişini imzalamayıb. Bu sənədin üzərində çalışmalar yekunlaşmayıb. Nümayəndə heyəti prezidentin ardınca müxtəlif rəsmilərlə görüşlər keçiriblər və bütün görüşlərdə eyni fikir vurğulanıb. Onları maraqlandıran Dağlıq Qarabağ münaqişəsinin həlli imkanları, iqtisadi əməkdaşlıq, regional layihələr və s. mövzulardır. Birinci mövzu barədə Milli Məclisin sədr müavini Valeh Ələsgərov məlumat verib. Valeh Əlsəgərovun əsas iki fikri diqqəti çəkib. O deyib ki, əgər bu gün Dağlıq Qarabağ əhalisi Azərbaycana qarşı çıxmasaydı, həyat səviyyələri bundan yüksək olardı. Bu o deməkdir ki, münaqişənin həlli Dağlıq Qarabağdakı erməni əhalisinin də xeyrinədir. Valeh Ələsgərovun ikinci fikri də maraqlıdır. Bildirib ki, Dağlıq Qarabağ, Cənubi Osetiya, Abxaziya, Donetsk münaqişələri ona görə yaradılıb ki, bu ölkələr Avropa İttifaqı və digər qurumlarla yaxınlaşa bilməsin. V.Ələsgərov bir başqa mövzu haqda danışarkən yenə də haqlı olaraq Rusiyaya işarə edib. Milli Məclisin sədr müavini deyib ki, Gürcüstanda Bakı-Supsa kəmərindən 1,5 km kənarda, Cənubi Osetiya adlanan ərazidə yurisdiksiyası məlum olmayan silahlı birləşmələr yerləşib və Dağlıq Qarabağ, Cənubi Osetiya, Abxaziya və digər problemlər ölkələrin müstəqil iqtisadi inkişafının qarşısını almaq üçün yaradılıb. Yəni münaqişələri yaradan və bununla müstəqil ölkələrin iqtisadi inklişafını ənəglləyən əsas dövlət Rusiyadır”.

Politoloq qeyd edib ki, ittihamlar yalnız Rusiya ilə bağlı səslənməyib:

"Aİ-nin nümayəndə heyəti ilə görüşən Xarici İşlər nazirinin müavini Mahmud Məmmədquliyev Brüsseli günahlandırıb. Birincisi, o deyib ki, işğal altındakı ərazilərdən təbii sərvətlər, mal və xidmətlər Aİ-nin bazarlarına çıxarılır. İkincisi, nazir müavininin sözlərinə görə, Avropa İttifaqından olan şirkətlər, onların filialları və törəmə şirkətləri Dağlıq Qarabağ və ətraf ərazilərdə fəaliyyət göstərir və bununla onlar Azərbaycan qanunvericiliyini pozmuş sayılırlar”.

Qeyd edək ki, Azərbaycan Prezidenti İlham Əliyev mayın 7-də Avropa İttifaqı-Azərbaycan Parlament Əməkdaşlıq Komitəsinin sədri, Avropa Mühafizəkarlar və İslahatçılar Qrupunun üzvü, Böyük Britaniyadan olan deputat Sayyad Kərimin başçılıq etdiyi Avropa İttifaqı-Azərbaycan Parlament Əməkdaşlıq Komitəsinin üzvlərindən ibarət nümayəndə heyətini qəbul edib. Bundan başqa, Bakıda Avropa İttifaqı-Azərbaycan Parlament Əməkdaşlıq Komitəsinin 15-ci iclası da keçirilib.