Bu gün "Bakı 2015” Avropa Oyunlarının Media kəndində jurnalistlər üçün növbəti mətbuat konfransı keçirilib. Patrik Hikki  həm yerli, həm də xarici ölkə jurnalistlərinin suallarını cavablandırıb. 

P.Hikki Hollandiyanın II Avropa Oyunlarına ev sahibliyi etməkdən imtina etməsi məsələsinə münasibət bildirib: "Bu sırf təsadüfi haldır ki, oyunlar Hollandiyada keçirilməyəcək. Bunun heç bir siyasi məsələlərlə bağlı əlaqəsi yoxdur”.

Komitə prezidenti bütün Olimpiya Oyunlarında boykot çağırışlarının olduğunu vurğulayıb: "Hər dəfə Olimpiya Oyunlarında kimsə boykota çağırış edir və ötən dövrdə sübut olunub ki, boykota çağırış heç bir nəticə vermir, həmişə uğursuzluğa düçar olur. Mən çox fəxr edirəm ki, bu Oyunlarda 50-ə qədər milli olimpiya komitəsi iştirak edir və 40-a qədər dövlət və hökumət başçıları açılış mərasimində iştirak edəcək. Bundan aydın olur ki, boykot çağırışları nəticəsiz qalır”.

Atletlər kəndinin üstünlüklərindən söz açan P.Hikki qeyd edib ki, bu Avropa Oyunlar üçün hazırlanmış yüksək səviyyəli bir arenadır: "Həqiqətən də bu kəndin üstünlükləri çoxdur”. 

Mətbuat konfransında Avropa Olimpiya Komitəsinin koordinasiya komitəsinin sədri Spiros Kapralos da jurnalistlərin suallarını cavablandırıb.