Talassemiyalı xəstələr Bakıda yolu kəsdi

Məlum olub ki, izdiham qan azlığından əziyyət çəkən xəstələrin etiraz aksiyasıdır. 

Onlar özlərinin problemlərini ictimaiyyətə çatdırmaq üçün Talassemiya Mərkəzinin yerləşdiyi Fətəli xan Xoyski küçəsi 128-də hətta yolu bağlamağa cəhd etdilər.

Hadisə yerinə çağırılan polis əməkdaşlarının müdaxiləsi nəticəsində yol açıldı və  etirazçılarla danışqılar aparıldı.

Həyəcan və təşviş içində olan talassemiyalı xəstələr emosiyalı tərzdə Səhiyyə Nazirliyinin onlara diqqət ayrımamasından şikayətlənirdilər. Beynəlxalq Tallasemiya Federasiyasının üzvləri – Çikaqo Universitetinin millliyətcə azərbaycanlı professoru Ənvər Quliyev və Yunanıstan Talassemiya Federasiyasının məsləhətçisi Maykl Anastoziadisin xəstələrlə görüş üçün Tallasemiya Mərkəzinin akt zalına buraxılmaması da etirazların coşmasına səbəb oldu.

Yetərli qanla təmin olunmadıqlarını deyən xəstələr hər il 10-dan artıq gəncin vəfat etdiyini diqqətə çatdırdılar.

 

23 yaşlı Sona Dubuxova həm tallasemiya xəstəsi, həm də "Savab Dünyası” Tallasemiya Assosiasiyasının rəhbəri kimi Modern.az-a aksiyanın səbəbini izah etdi.          

Bildirdi ki, Beynəlxalq Tallasemiya Federasiyasının üzvləri ilə görüş 2 ay əvvəldən razılaşdırılıb, amma buna mane olmağa çalışılıb. Dərmanların kəsilməsindən narazılıq edən şikayətçi xəstələr adından Səhiyyə Nazirliyinin baş hematoloqu Çingiz Əsədovun davranışlarına da etirazlarını bildirdi.

"Tallasimiya ilə bağlı müvafiq dövlət proqramı var. Dövlət proqramında ölkəyə lazımı dərmanların gətirilməyi nəzərdə tutulub. Hər il 10-dan çox xəstəmizi itiririk. Nəticədə isə ölümlərin səbəbini "özünə baxmırdı” deməklə izah edirlər. 

Həkimlərdə günah görmürəmı. Mən dəfələrlə Səhiyyə Nazirliyinə məktub yazsam da, 7 aydan çox müddət keçməsinə baxmayaraq heç bir cavab verilmir. Halbuki, dövlət orqanları vətəndaşın müraciətinə 1 aydan gec olmayaraq cavab verməlidir.

2 mindən artıq xəstə var. Milli Tallasemiya Mərkəzindəki transplantasiya şöbəsində ildə cəmi 22 xəstə müalicə olunur, bununla xəstəliyin qarşısını almaq mümkün deyil. Biz qan azlığı yaşayırıq. Nəyə görə hər il talassemiyalı xəstələrin sayı azalmaq əvəzinə artmaqda davam edir. Yeni qanuna əsasən, evlənən cütlüklərdən tibbi arayış tələb olunur. Amma tanıdığım bir çox insanlar pulla həmin arayışları alaraq, nikaha daxil olublar”. 

Müsahibimiz bildirdi ki, Səhiyyə Nazirliyinin aldığı dərmanlar keyfiyyətsizdir: "Bu gün hepatitə yoluxan xeyli talassemiyalı xəstə var”,-deyə o, bildirdi.

Etirazçıların qarşısına Talassemya Mərkəzinin rəhbərliyi də çıxdı və danışıqlar aparıldı. Ümid edirik ki, hər gün yaşamaq üçün mübarizə aparmağa məcur olan talassemiyalı xəstələrin harayı Səhiyyə Nazirliyində eşidiləcək və onlar üçün ayrılan çoxmilyonlu vəsait təyinatı üzrə xərclənəcək. 

Mövzunu diqqətdə sağalyacaq, Səhiyyə Nazirliyinin mövqeyini öyrənməyə çalışacağıq.