Şahbaz Xuduoğlu polisə müraciət etdi

Modern.az xəbər verir ki, bu barədə nəşriyyatın direktoru Şahbaz Xuduoğlu polisə müraciət edərək məlumat verib. Ş.Xuduoğlu bildirib ki, əməkdaşlıq etdikləri Qazax rayon sakini, 1989-cu il təvəllüdlü Seymur Həsənov 2015-ci ilin sentyabr ayından bu ilin mart ayına kimi nəşriyyatın anbarından məntəqələrə paylamaq adı ilə götürdüyü kitabları 5916 manata satıb, lakin şirkətə ödəniş etməyib. S.Həsənov həmin məbləği mənimsəyib. Araşdırma aparılır.

Şahbaz Xuduoğlu "Qafqazinfo”ya açıqlamasında bildirib ki, həmin şəxs bundan öncə də başqa nəşriyyatlarda oxşar əməllər törədib:

"Seymur Həsənov nəşriyyatın kitab yayımında işçi olub. Oradan kitabları götürüb mağazalara paylayıb. Qeyd edilən müddətdə isə kitabları həmin marketlərə paylamaq əvəzinə başqa müxtəlif yerlərdə daha ucuz qiymətə satıb. Marketlərə satdığı qisminin də pulunu götürüb və heç birini nəşriyyata ödəməyib.

Bizim mühasibatlıq bunu aşkar edəndən sonra özünü və valideynlərini də dəvət edib danışdıq. Bəlli oldu ki, əvvəldən də başqa nəşriyyatlarda bu cür fəaliyyətlə məşğul olub. Şirkətin nümayəndəsi bu barədə polisə müraciət etdi.

Hazırda təhqiqat aparılır, buna görə də Seymur Həsənovun özü ilə bağlı hələ ki, bir tədbir seçilməyib”.