Komitə sədrindən təhlükələr barədə XƏBƏRDARLIQ

 

Modern.az-ın xəbərinə görə, çıxış edən Milli Məclisin Səhiyyə komitəsinin sədri, Azərbaycanın TÜRKPA-dakı nümayəndə heyətinin üzvü Əhliman Əmiraslanov deyib ki, ətraf mühitin problemlərinə cəmiyyət həssas olmalıdır.

Deputat bildirib ki, cəmiyyət ətraf mühitlə bağlı problemlərlə məşğul olmazsa, gələcəkdə çox ciddi təhlükələr yaranır:

 

"Əsas məsələlərdən biri iqlim dəyişikliyi və Günəşin azon qatının deşilməsidir. Ətrafa mühitə insanların atdığı tullantılar ciddi təhlükə yaradır. Hazırda dünyada içməli su problemi də var. 1.5 milyard insan çirkli sudan istifadə edir. Bundan başqa, torpaqların deqradasiyaya uğraması nəticəsində də məhsuldarlıq azalır, meşə sahələri qırılır, bunun cüzi hissəsi bərpa edilir.

 

Son yüz ildə dünyada əhalinin dörd dəfə artması , sənaye müəssisələrinin çoxalması bu cür problemlər yaradır”.

 

Ə.Əmiraslanov söyləyib ki, bu problemlərin aradan qaldırılması üçün təkliflər irəli sürülməlidir. Sonra çıxış edən komissiyanın sədr müavini Feyzullah Kıyıklık bildirib ki, iqlim dəyişikliyi Türkiyəyə də təsirsiz ötüşmür.

O əlavə edib ki, TÜRK PA-da təmsil olunan ölkələr birləşərək birgə mübarizə aparmalıdırlar: "Ətraf mühitin problemlərinə həsr olunan 63 səhifəlik sənəd hazırlanıb, bu sənəddə iqlim dəyişikliyi ilə bağlı məsələyə toxunulub”.

Ekologiya və təbii sərvətlər nazirinin müavini Firdovsi Əliyev deyibki, bu günə qədər Azərbaycanda ekologiya və ətraf mühitin mühafizəsi ilə bağlı 45 qanun qəbul olunub:

 

"Əgər müstəqilliyin ilk illərində Azərbaycanda xüsusi mühafizə olunan ərazilərin hissəsi 4.5 faiz idisə, bu gün həmin rəqəm 10.5 faizə çatıb. 2000-ci ildə ölkədə 1 milli park var idi. Hazırda isə ölkəmizdə 9 milli park var. Azərbaycan gələcək nəsillərə ölkə ərazisində 10.3 faiz xüsusi mühafizə olunan ərazini ötürəcək. Bu gün Avropada vəhşi təbiət qalmayıb. Əgər vəhşi təbiət görmək istəyirsinizsə, buyurun Azərbayacana gəlin”.

Qlobal iqlim dəyişikliyi: üzv ölkələr üçün səbəbləri və nəticələrinə dair tövsiyə qərarının layihəsi təsdiq olunub.