“Mən gənc jurnalistəm” layihəsinə qeydiyyat başladı

Layihə gənclərə jurnalistika üzrə bilik və bacarıqlarını formalaşdıraraq peşəkar fəaliyyətə hazırlıqlı olmaları üçün imkan yaradacaq.

Layihə jurnalistikaya marağı olan gənclərin bu sahədə nəzəri və praktiki biliklərinin inkişaf etdirilməsi, natiqlik bacarıqlarının formalaşdırılması və asudə vaxtlarının səmərəli dəyərləndirmələri məqsədilə həyata keçirilir.

Layihə çərçivəsində seçiləcək iştirakçılar, təlimlərdə iştirak edəcəklər və komandalara bölünəcəklər. Daha sonra gənclər, 3 mərhələdən ibarət olan müsabiqədə iştirak edəcəklər. Müsabiqənin hər bir mərhələsini uğurla başa vurmuş 3 komanda layihənin final mərhələsinə yüksələcək. Final mərhələsində iştirak edəcək bütün komandalar sertifikat və dəyərli hədiyyələrlə mükafatlandırılacaqlar.

Qeyd edək ki, Layihə Azərbaycan Respublikasının Prezidenti yanında Gənclər Fondunun maliyyə dəstəyi və DVC-nin ("Vətəndaş Cəmiyyətində Debat” İctimai Birliyi) tərəfdaşlığı ilə həyata keçirilir.

Layihəyə Bakı şəhərində yaşayan və jurnalistika sahəsində maraqlı olan 30 gənc seçiləcək. Layihədə iştirak ödənişsizdir.