Mətbuatdan vəzifəyə gedən məmurlar - SİYAHI

Azxeber.com milli mətbuat günü ərəfəsində vaxtilə jurnalist kimi çalışmış, hazırda isə yüksək vəzifə daşıyan məmurlarla bağlı araşdırma aparıb.

Araşdırma nəticəsində məlum olub ki:

Nərimanov rayon İcra Hakimiyyətinin başçısı Abdin Fərzəliyev əmək fəaliyyətinə jurnalist kimi başlayıb. 1992-1993-cü illərdə "Naxçıvan" qəzetində müxbir kimi fəaliyyət göstərmiş icra başçısı sonradan ictimai fəaliyyətlə məşğul olub və "Əlincə" Cəmiyyətində şöbə müdiri olub.

Masallı rayon İcra Hakimiyyətinin başçısı Rafil Hüseynovun da ilk fəaliyyət sahəsi jurnalistika ilə bağlı olub. Nə az, nə çox, 8 il jurnalist işləmiş R.Hüseynov "Kommunizm yolu" qəzetində korrektordan şöbə müdiri vəzifəsinə qədər yüksəlib.

Bakı şəhər İcra Hakimiyyəti başçısı aparatının rəhbəri Rasim Quliyev uzun müddət "Səs” qəzetində çalışıb. Bu qəzetdə məsul katib, şöbə müdiri, Baş redaKtor müavini işləyib.

Azərbaycan Dövlət Nəşriyyatının direktoru Ağabəy Əsgərov son vəzifə təyinatına qədər uzun müddət jurnalist, baş redaktor kimi fəaliyyət göstərib. İqtidaryönlü "Səs” qəzetinin Baş redaktoru olub.

Milli Məclisin deputatı, Azərbaycan Prezidenti yanında əfv komissiyasının üzvü Elmira Axudnova uzun müddət jurnalist kimi çalışıb. Rusiyada nəşr olunan nüfuzlu "Literaturnaya” qəzetinin müxbiri və "Azadlıq" radiosunun Azərbaycan üzrə müxbiri, ardınca "Türk dünyası" jurnalının publisistika şöbəsinin müdiri vəzifələrində çalışıb.

Xatırladaq ki, hazırda Milli Məclisdə digər jurnalistlər də təmsil olunur ki, onların arasında Əflatun Amaşovu, Aqil Abbası, Bəxtiyar Sadıqovu, Hikmət Babaoğlunu misal göstərmək olar.