Avropa Birliyi Gürcüstandan narazıdır - Şengen vizası bərpa oluna bilər

Almaniya növbəti dəfə ölkəyə qanunsuz olaraq gələn Gürcüstan vətəndaşlarının kütləvi deportasiyasını həyata keçirib.

Modern.az Gürcüstan KİV-nə istinadən xəbər verir ki, göyərtəsində 62 Gürcüstan vətəndaşının olduğu təyyarə reysi Leypsiqdən Tbilisiyə qayıdıb.

Sonuncu dəfə 2018-ci ilin sentyabrında 65 Gürcüstan vətəndaşı Almaniyadan təyyarə ilə deportasiya olunmuşdu.

Avropa Birliyi qanunsuz miqrasiyanı Gürcüstanla vizasız rejimi saxlamaq üçün ən böyük təhlükə sayır. Məsələ ilə bağlı Almaniya, Fransa, İslandiya və İsveç öz narahatlıqlarını bildirib.   

Onlar vizasız rejimin saxlanılması üçün Gürcüstan hakimiyyətinin qanunsuz miqrasiyaya qarşı daha effektli mübarizə aparmalı olduğunu, əks halda, Şengen vizasının bərpa olunacağını bəyan edib.