"Boşanmış qadın başqasını sevə bilər" - Komitədən açıqlama

Azərbaycanda boşanmış kişilərin keçmiş həyat yoldaşlarına qarşı zorakılıq göstərməsi ilə bağlı faktlarla çox qarşılaşırıq.

Anews.az Oxu.Az-a istinadən xəbər verir ki, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova boşanmış qadınların ikinci dəfə ailə qurması ilə bağlı problemlərə münasibət bildirərkən deyib.

Onun sözlərinə görə, kişi qadından boşanıbsa, artıq onun üzərində heç bir hüququ yoxdur:

"Kişinin hüququ yalnız uşaqları üzərindədir. Boşanmış qadın başqasını sevə bilər və yenidən ailə həyatı qura bilər. Bu, onun hüququdur. Keçmiş həyat yoldaşının ixtiyarı yoxdur ki, boşanmış arvadının ailə qurmasına mane olsun, onu öldürsün. Təəssüf edirik ki, Azərbaycanda boşanmış kişilərin keçmiş həyat yoldaşları üzərində təzyiqləri, onların yenidən ailə qurmasına mane olması və zorakılıq göstərməsi ilə bağlı faktlarla rastlaşırıq”.

Sədaqət Qəhrəmanova qeyd edib ki, problemin həlli üçün bu istiqamətdə maarifləndirici işlər artırılmalıdır:

"Burada medianın da üzərinə böyük öhdəlik düşür. Bu istiqamətdə maarifləndirici işlər görülməlidir və həmin insanların düşüncələrinə təsir edilməlidir”.