"Heç bir təsəlli ananın övlad acısını azalda bilmir, oğlum..." - Şəhid anası

"3 il də keçdi şəhadətindən, canım oğlum. Bu gün sən öz qəhrəmanlığınla dillər əzbəri oldun. Xalqın övladı oldun. Bu 3 ildə nələr çəkdim, nələr yaşadım".

BiG.AZ xəbər verir ki, bu sözləri Aprel döyüşlərində şəhid olan Əbdülməcid Axundovun anası Ceyran Axundova deyib. Övladının yoxluğuna alışa bilməyən ananın bu sözləri ürək parçalayıb:

"Yoxluğuna necə dözdüm, həsrətinlə necə yaşadım. Sənsizliyə dözmək elə çətin, elə acı, elə ağırdır ki... Bu yükü daşımaq olduqca ağır və çətindir. Heç bir sözlə ananın övlad həsrətini ifadə etmək olmur. Heç bir təsəlli ananın övlad acısını azalda bilmir. Elə çox darıxmışam ki sənin üçün. Sənə qovuşacağım günü səbrsizliklə gözləyirəm, canım oğlum".

Qeyd edək ki, 23 yaşlı Əbdülməcid Nadirşah oğlu Axundov 2016-cı il aprel döyüşlərində şəhid olub.