XTD komandiri Şuşa döyüşlərindən danışır - VİDEO

Vətən müharibəsində torpaqlarımızı düşmən işğalından azad edən qəhrəmanlar sırasında Daxili İşlər Nazirliyinin (DİN) Daxili Qoşunlarının xüsusi təyinatlı döyüşçülərinin də xüsusi rolu olub.
Onlardan da biri "Qarabağ” ordeni ilə təltif olunmuş mayor Nurlan Məmmədovdur. O, Daxili Qoşunların N saylı hərbi hissəsinin "Kobra" Xüsusi Təyinatlı Dəstəsinin (XTD) komandiridir. Döyüşlərə Füzuli istiqamətindən qoşulan N.Məmmədov Şuşanın düşməndən azad olunmasında göstərdiyi şüacətləri ilə yadda qalıb.

"Ən çətin döyüşlərimizdən biri elə Şuşanın azad edilməsi uğrunda gedən savaş idi. Düşmənin müəyyən texnikası ilə üz-üzə gəldik. Biz az sayda - 15-20 nəfərlik qruplara bölünmüşdük. Şuşada ermənilərin 110-120 nəfərlik şəxsi heyəti üstümüzə gəldi. Biz onlarla elə döyüşdük ki, elə bildilər böyük dəstə və taborla gəlmişik. Bizdə o qədər güc, iman var idi ki, onları qorxmadan, usanmadan məhv etdik”.

Qeyd edək ki, N.Məmmədov 1983-cü ildə Qərbi Azərbaycanın Uluxanlı kəndində anadan olub. 2008-ci ildən DİN Daxili Qoşunlarının XTD-də xidmətə başlayıb. Bir müddət sonra zabit olmaq üçün Daxili Qoşunların orta ixtisas hərbi məktəbində təhsil alıb. N.Məmmədov həmin məktəbi fərqlənmə diplomu ilə bitirib və Daxili Qoşunlarda müxtəlif vəzifələrdə çalışıb.


www.anews.az