Nərmin Quliyevanın öldürülməsində təqsirli bilinən şəxsdən XƏBƏR VAR

Gəncə Ağır Cinayətlər Məhkəməsində hakim Dadaş İmanovun sədrliyi ilə 10 yaşlı Nərmin Quliyevanın öldürülməsində ittiham edilən İlkin Süleymanovun məhkəmə prosesi davam etdirilib. Hakim mərhum uşağın valideynlərini dinlədikdən sonra prosesi sentyabrın 8-dək təxirə salınıb.

Bu barədə İlkin Süleymanovun vəkili Əlibaba Rzayev deyib.

"İşin bir aya yaxın müddətə təxirə salınması hakimlərin yay istirahəri ilə bağlıdır".- deyə, vəkil bildirib.

Məhkəmə qarşısında toplaşan 47-yaşlı Süleymanovun yaxınları "İlkinə azadlıq!", "Əsl cinayətkar cəzalandırılsın!" şüarları səsləndirib.

Əlibaba Rzayev bildirib ki, İlkin Süleymanovun azyaşlı qızı öldürməsini sübut edən hər hansı dəlil yoxdur.

"Sadəcə 2019-cu ilin yanvarında Süleymanovun evinin yanına Nərminin yanmış meyitini atıblar və İlkin bu barədə polisə məlumat verib. Suleymanovu dərhal polis idarəsinə apararaq ondan 2019-cu il yanvarın 6-dan 10-dək zor tətbiq edərək özünə qarşı ifadə alınıb. Maraqlısı budur ki, Nərminin ailəsi həmin günlərdə prezidentə müraciət edərər İlkinin azadlıga buraxılması və həqiqi qatilin tapılmasını tələb ediblər. Amma sonra valideynlər tələblərinə zidd cıxaraq İlkini günahlandırırlar. Qarşı tərəfin suallarına cavab verərək deyirlər ki, İlkini dövlət həbs edib, deməli, müqəssir elə Süleymanovdur".

Vəkil Rzayev hesab edir ki, polis müstəntiqi günahı olmayan Süleymanovdan qanunsuz şəkildə izahat almaqla həqiqi qatilin ya qatillərin məsuliyyətdən qaçmasına şərait yaradır.

"Məhkəməni yanlış tərəfə çəkməkdə maraqlı qüvvələr var,” o qeyd edib.

Nərmin Quliyeva Tovuz rayonunun Dondar Quşcu kəndində 2019-cu il noyabrın 21-də itkin düşüb, yanvarın 6-da qızın yanmış meyiti kənddə tapılıb.

Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşlarından ibarət istintaq-əməliyyat qrupu tərəfindən cinayətin açılması istiqamətində həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində cinayəti törətməkdə şübhəli bilinən Dondar Quşçu kənd sakini İlkin Süleymanov tutularaq istintaqa cəlb edilib.