ATB məşhur "Expedia” platmorması ilə əməkdaşlığa başladı

Azərbaycan Turizm Bürosu(ATB) aviabiletlər, hotel, tur paketləri və turistik səfərləri onlayn sifariş etməyə imkan verən, dünyaca məşhur "Expedia” platforması ilə rəqəmsal əməkdaşlığa başlayıb, bu barədə ATB-dən anews.az-a verilən məlumatda bildirilib.

Əməkdaşlıq çərçivəsində "expedia.com” və "hotels.com” saytlarında Azərbaycana uçuşlar, hotellər və turizm təklifləri haqqında ətraflı informasiyalar yerləşdirilib. 

"Yerləşdirilən informasiyaların hədəf auditoriyası Yaxın Şərq, Böyük Britaniya, Türkiyə, Rusiya və İsrail olaraq seçilib. Səyahət etmək üçün yeni ölkə axtarışında olanları Azərbaycanı kəşf etməyə çağıran kampaniya istifadəçiləri müvafiq səhifələrə yönəldərək həm məlumatlılığı artırmağa, həm də səyahətin asan şəkildə planlaşdırılmasına xidmət edəcək”,-  deyə məlumatda bildirilib.

Beynəlxalq səviyyədə kütləvi təbliğat kampaniyalarının əhəmiyyətindən danışan Azərbaycan Turizm Bürosunun Baş icraçı direktoru Florian Zenqstşmid Azərbaycanın beynəlxalq bazarlardakı fəaliyyətini tədricən bərpa etdiyindən söz açıb:

""Expedia” ilə yanaşı, "Skyscanner”, "Wego”, "Aviasales” platformaları ilə də əməkdaşlıq edilir, beynəlxalq media platformaları vasitəsilə Azərbaycanın turizm imkanlarının daha geniş kütləyə çatdırılması istiqamətində isə işlər davam etdirilir”, -deyə baş icraçı direktor bildirib.

Tezliklə hədəf bazarlarda nümayəndəliklərin yenidən fəaliyyətə başlayacağını bildirən Florian Zenqstşmid beynəlxalq turizm və səyahət sərgilərində iştirak etməyin vacibliyinə də toxunub.


www.anews.az