16-18 yaşlı yeniyetmələrə niyə Pfizer vaksini vurulur?

Azərbaycanda Səhiyyə Nazirliyinin Elmi Tibbi Şurası və TƏBİB-in Elmi Komitəsi tərəfindən xroniki xəstəlikdən əziyyət çəkən 16-18 yaşlı yeniyetmələrə COVID-19 əleyhinə mRNT Pfizer peyvəndinin vurulması prosesinə başlanılıb. Qərara əsasən bu şəxslərə başqa vaksinlər vurulmayacaq. Bir qism mütəxəssislər bunu ölkədə Pfizer vaksinin sayının artması, bir qism isə onun daha səmərəli olması ilə izah edir.  
 
Həkim infeksionist Vüqar Cavadzadə bildirdi ki, Pfizer vaksininin digər vaksinlərlə müqayisədə heç bir fərqi yoxdur.
 
"Ölkəyə istifadə olunan bütün vaksinlər ÜST tərəfindən təsdiq olunub. Vaksinlər arasında heç bir fərq yoxdur. Sadəcə peyvəndlənmə başladığı vaxtlar ölkədə ancaq SinoVac vaksini olduğu üçün ən çox o vaksin istifadə olunurdu. İndi isə Pfizer vaksini ölkəyə gətirilib. Ola bilər ki, hazırda ölkədə Pfizer ehtiyatı çoxdur və buna Səhiyyə Nazirliyi və TƏBİB 16-18 yaşlı yeniyetmələr arasında bu vaksinin vurulması qərarını veriblər", - deyə infeksionist qeyd edib.
 
İnfeksionist Nicat Əzimli isə Pfizerin vurulması səbəbini effektinin daha çox olması ilə əlaqələndirdi.
 
"Azərbaycanda hazırda delta ştampının yayılmasını nəzərə alsaq bu virusa qarşı ən effektli peyvənd Pfizer vaksini sayılır. Digər vaksinlərin effektliyi daha az olduğu üçün yeniyetmələrə məhz Pfizer vaksininin vurulması qərarı doğru hesab edilə bilər",  - deyə Nicat Əzimli bildirdi.
 
Səhiyyə Nazirliyindən niyə Pfizer vaksinin seçilməsinə cavab olaraq bildirildi ki, bu qərar Avropa Dərman Agentliyi, Amerika Ərzaq və Dərman Administrasiyasının  yeniyetmələrə mRNT Pfizer ("Comirnaty”) peyvəndinin vurulmasına rəsmi icazələrin verilməsi ilə bağlıdır. Bunun başqa bir səbəbi yoxdur.
 
Azərbaycanda COVID-19 əleyhinə SinoVac, Sputnik V, Vaxzevria və Pfizer vaksinindən istifadə olunur.
 

www.anews.az