Bu il sığınacaqlara 200-dən çox adam müraciət edib

10.11.2021 18:46

2021- ci ilin 10 ayında həssas əhali qruplarından olan şəxslər üçün Sığınacaq və Sosial Reabilitasiya Müəssisələrinə 213 nəfər müraciət edib. Bunu Əmək və Əhalinin Sosial Müdafiəsi Nazirliyi tabeliyindəki Sosial Xidmətlər Agentliyinin İctimaiyyətlə əlaqələr şöbəsinin müdiri Murad Həşimov anews.az-a açıqlamasında deyib.

"Ötən il qəbul edilən şəxslər də daxil olmaqla həssas əhali qruplarından olan şəxslər üçün Sığınacaq və Sosial Reabilitasiya Müəssisəsində bu ilin ilk 10 ayında 287 nəfərə xidmət göstərilib. Həssas əhali qruplarından olan şəxslər üçün Sığınacaq və Sosial Reabilitasiya Müəssisəsi baxımsız, kimsəsiz və sosial təhlükəli vəziyyətdə olan yetkinlik yaşına çatmayanlar, müəyyən yaşayış yeri olmayan 18 yaşından yuxarı şəxslər, məişət zorakılığından zərər çəkmiş şəxslər, habelə görmə qabiliyyəti məhdudluğu olan şəxslərə xidmət göstərilir", - deyə o əlavə edib.

Həşimov bildirib ki, 2021-ci il avqustun 1-dən daha bir şöbə - Məişət zorakılığından zərər çəkmiş şəxslərin sosial reabilitasiyası şöbəsi fəaliyyətə başlayıb.

"Həmin şöbəyə ötən 3 ayda 21 şəxs qəbul olunub. Onlardan 10-u qadın, 11-i onların uşaqlarıdır. Bu şəxslər sığınacaqla təmin olunmaqla bərabər, psixo-sosial dəstək və məsləhət yardımı xidmətindən də yararlanır, sosial reabilitasiyaları, sosial statuslarının bərpası istiqamətində fərdi iş planı üzrə işlər aparılır", - deyə Həşimov söyləyib.

Bəs ölkədəki özəl sığınacaqlarda vəziyyət necədir? Özəl sığınacaqlara müraciət edənlərin sayı ilə dövlət müəssisələrinə müraciət edənlər arasında müqayisə aparmaq üçün bir neçə özəl sığınacaqlara üz tutduq.

Azərbaycan Uşaqlar Birliyinin sədri Kəmalə Ağazadə bildirib ki, ümumilikdə bu ilin 10 ayında qaynar xəttə 1984 zəng daxil olub.

"Bizə müxtəlif problemlərlə bağlı zənglər edilir. Evdə şiddət görən qadınlar, məhkəmə prosesindən şikayətçi olanlar və uşaqları əlindən alınan qadınlarla bağlı müraciətlər daha çoxdur. Daxil olan zənglərin 40% -i uşaqlarla bağlıdır", - deyə sığınacağın rəhbəri əlavə edib.

Təmiz Dünya Qadınlara Yardım ictimai birliyinin sədri Mehriban Zeynalovanın sözlərinə görə, bu ilin 10 ayında onlara 437 nəfər müraciət edib.

"Bunlardan 27-si yeniyetmə, 203 qadın, 216 nəfər isə uşaqlardır. Keçən illə müqayisədə bu il sığınacağımıza müraciət edənlərin sayında 50 faiz artım müşahidə olunur. Qadın və uşaqlarda 50 faizədək, yeniyetmələrdə isə daha çox artım olub. Məsələn, keçən il bizə 3 yeniyetmə müraciət etmişdisə, bu il onnların sayı 17-ə çatıb", - deyə sədr söyləyib.

Aytac Zeynalova

Xəbəri bəyəndiniz?

Sosial şəbəkələrdə paylaş