Mübariz Mənsimovun növbəti gəmisi iki şəhid qardaşın adını DAŞIYACAQ

"Palmali” Şirkətlər Qrupu dənizə buraxılacaq növbəti gəmiyə Vətən müharibəsinin şəhidləri olan İman və Bəhram Məmmədzadə qardaşlarının adını verəcək, bu barədə anews.az-a şirkətin mətbuat katibi Fidan Quliyeva bildirib.

Bakı şəhəri Binə qəsəbəsində doğulan əslən Lerikdən olan 22 yaşlı İman və 20 yaşlı Bəhram Məmmədzadələr Rusiyada ali məktəbi bitirdikdən sonra Bakıya gələrək hərbi xidmətə çağırılmalarına 1 il qalmasına baxmayaraq hərbi komissarlığa gedib könüllü şəkildə Orduya yazılıblar. 2020-ci il sentyabrın 27-də döyüşlər başlayanda ilk olaraq cəbhəyə yola düşüblər. Döyüşlərə Füzuli rayonunda başlayıblar. Füzuli, Cəbrayıl və Zəngilanın kəndlərinin işğaldan azad olunmasında iştirak ediblər. Qardaşlar noyabrın 2-də Xocavənd rayonunun Qırmızı Bazar qəsəbəsi uğrunda gedən qızğın döyüşlərdə şəhid olublar. Şəhid qardaşlar İman və Bəhram "Vətən uğrunda" və "Xocavəndin azad olunmasına görə" medalları ilə təltif olunublar.

Mübariz Mənsimov və "Palmali Holdinq”in İdarə Heyətinin qəbul etdiyi qərara əsasən, "Palmali Holdinq”ə məxsus gəmilərin adları dəyişdirilərək, Vətən uğrunda qəhrəmancasına həlak olmuş şəhidlərimizin adları verilir. Məqsəd şəhidlərimizin adlarını ucaltmaq və dünya sularında tanıtmaqdır. İlk gəmiyə şəhid general-mayor, Azərbaycanın Milli Qəhrəmanı Polad Həşimovun adı verilib. "General Polad Hashimov” gəmisi 30 mart tarixində Türkiyədən dünya sularına yola salınıb. Aprel ayının 16-da isə Bolqarıstanın Varna şəhərindəki "Terem Shipyard” tərsanəsindən, II Qarabağ müharibəsində şəhid olmuş Əli Seyran oğlu Nəcəfovun adını daşıyan neft tankeri istifadəyə veriləcək. 
www.anews.az