14 il öncə itkin düşən qız hələ də tapılmayıb
11.05.2022 10:16
14 il öncə Azərbaycanda itkin düşən qız hələ də tapılmayıb. Bunu jurnalist Elnarə Məmmədova öz feysbuk səhifəsində paylaşım edib.
O bildirib ki, Laura adlı xalası nəvəsi 15-16 yaşlarında Şəmkirin Dəllər Cəyir kəndində itkin düşüb. Axtarışlara baxmayaraq, onu tapmaq mümkün olmayıb.
"Oxumaq istəyirdi, amma xalamın dar düşüncəli oğulları qıza imkan vermədi. Lauranın rəfiqəlik etdiyi qızın anası insan alverinə görə məhkum olunmuşdu. Sonuncu dəfə evdən bezəndə Laura rəfiqəsinin evinə getdi və bir daha geri qayıtmadı. O vaxtı televiziyada işləyirdim, axtarış haqqında elanı efirdə də verdik.
Jurnalist Şəmkir polisinə, DİN-ə dəfələrlə məktub yazdığını bildirib.
"Rəfiqəsinin ailəsini, insan alveriylə məhkum olunan birini heç kim istintaqa cəlb etmədi. Xalam bildirdi ki, o qadın nəvəsini çox ehtimal kiməsə satıb. Amma polis barmağını belə qaldırmadı. Bir gün dedilər Sumqayıtda fahişələrin işlədiyi yerdə görüblər. Lauranın şəklini götürüb xalamla Sumqayıtda bütün barları, fahişəxanaları gəzdim. Qızı tapa bilmədik. Otaqlara girib fahişə kimi işləyən qadınlara da baxmağa icazə vermədilər. Qız 18 yaşına çatmadığı üçün xaricə çıxarıldığını da yoxlaya bilmədik. Dedilər çox ehtimal adını dəyişib yeni pasport alıblar. Xalam illər əvvəl Laura deyə-deyə öldü. Nə DİN, nə Şəmkir polisi barmağını qaldırdı o qızı tapmaq üçün”- jurnalist əlavə edib.
Bir neçə gün öncə jurnalist Aytən Məmmədova Tovuzda itkin düşən, daha sonra öldürüldüyü deyilən Nərmin Quliyevanın məhkəməsindən yazdığı üçün hədələnmişdi.
Elnarə Məmmədova da yuxarıdakı fikirlərini situasiyaya görə yazdığını bildirib.
"Əminəm ki, Lauranın itməsini ört-basdır edənlər Tovuzdakı qızın da axırına çıxıblar. Və bu ört-basdırı edənlər balaca adamlar deyil. Allah bilir yazıq qızlar indi hardadır? Nə əzab çəkirlər?!”
Aytac Zeynalova
www.anews.az
Telegram
Bizi Teleqramda izləyin
Oxşar xəbərlər
Oxşar xəbərlər
Son xəbərlər 
Daha çox 
Foto
Video
