"Müdafiə Xətti" iyulun 1-də etiraz aksiyası keçirəcək

Rüfət Səfərov bildirib ki, aksiyada məhkəmələrin qanunvericiliyin tələblərinə zidd olaraq qapalı keçirlməsinə etiraz ediləcək.

"Məhkəmələrin xüsusilə siyasi yüklü mühakimələri məzhəkəyə çevirmələri azlıq edirmiş kimi "açıq tamaşaları" bağlı elan edirlər, işlərin icraatı qapalı aparılır. Hüquq müdafiəçilərini, media mənsublarını, vətəndaş cəmiyyəti fəallarını məhkəmə zallarına buraxmırlar. Ümumiyyətlə, bir qayda olaraq, vəkillərdən və təqsirləndirilən şəxslərin ailə üzvlərindən savayı kimsəni prosesə buraxmırlar" , o qeyd edib.

 

Səfərov bildirib ki, aksiya sabah saat 16-00-da baş tutmalıdır.

"Məhkəmə-Hüquq Şurasının qarşısında (Bakı Apellyasiya Məhkəməsinin yanı, Zahid Xəlilov-540) açıq və ədalətli məhkəmə tələbilə etiraz aksiyası keçirəcəyik. Tələblərimizi səsləndirəcəyik, qətnaməmizi oxuyacağıq, əgər Məhkəmə-Hüquq Şurasının Aparatından şəxsən dinləmək istəsələr, görüşüb naraharahtçılığımıza səbəb olan hüquqi məsələləri bildirəcəyik və gəldiyimiz yerlərə dönəcəyik. Polis əməkdaşlarına müraciət edirik ki, təhlükəsizliyimizi təmin edib, aksiyanın keçirilməsinə əngəl olmasınlar", - Səfərov deyib.

Daxili İşlər Nazirliyinin Mətbuat Xidmətinin şöbə rəisi Elşad Hacıyevin sözlərinə görə, müvafiq icra hakimiyyəti orqanının icazəsi olmadan keçiriləcək istənilən qeyri-qanuni aksiyanın qarşısı alınacaq.

 

"Müdafiə Xətti" hüquq müdafiə təşkilatı 2021-ci ildə təsis edilib. Təşkilatın təsisçiləri keçmiş müstəntiq, siyasi məhbus kimi tanınan Rüfət Səfərov, hüquqşünas Rəşid Hacılı, keçmiş vəkil Əlayif Həsənov, ictimai fəallar Zəfər Əhmədov, Sayğın Rüstəmli, Zaur Əkbər və jurnalist Təzəxan Mirələmlidir.