Rus bölməsinə şagird qəbulu üçün yerlərin çoxu dolub - Emin Əmrullayev

 

"Hazırda bəzi məktəblərdə rus bölməsi üzrə boş yerlər var. 14 min yerə 18 min adam müraciət edirsə, deməli, 4 min nəfər keçə bilməyəcək. Bir sinifdə də şagird sayını artıranda təhsilin keyfiyyəti də aşağı düşür. Siniflərdə şagird sayı artırılsa sonra da şikayətlər olacaq ki, siniflərdə şagird sayı çoxdur. Rus bölməsində təhsilin keyfiyyətini qoruyub saxlamaq bu gün bizim üçün ən böyük problemdir. Çünki lazımi sayda müəllim yoxdur. Kifayət qədər vakansiya var, lakin lazımi sayda namizəd tapa bilmirik. Buna görə də valideynlərdən bunu nəzərə almağı tövsiyə edirəm. Hesab edirəm ki, heç bir valideyn övladının zəif təhsil almasını istəməz. Azərbaycanda 6 il yaşayıb Azərbaycan dilini başa düşmürsə, sualı mənə yox, valideynə vermək lazımdır. Əgər uşaq 6 il ölkədə yaşayırsa, o, Azərbaycan dilini bilməlidir ", nazir bildirib.

 

2022-ci ildə Azərbaycanda orta məktəblərdə rus dilində təhsil alanların sayı artıb. Əgər 5 il əvvəl 90 min şagird rus dilində təhsil alırdısa, bu tədris ilində onların sayı 150 mini keçib. Bu, Azərbaycanda təxminən hər 10 şagirddən 1-nin dövlət büdcəsi hesabına rus dilində təhsil alması deməkdir. Azərbaycanda fəaliyyət göstərən 4 mindən çox ümumtəhsil məktəbinin 300-dən çoxunda rus bölməsi var. Ölkə üzrə ümumtəhsil müəssisələrinin rus bölməsində təhsil alan şagirdlərin sayı 156 mindən çoxdur. Bu isə 2021-2022-ci tədris ili üzrə qeydə alınan 1 milyon 590 minə yaxın şagirdin təxminən 10 faizini təşkil edir.

Gülnar Nazimqızı