Baş Prokurorluqdan Əvəz Zeynallı AÇIQLAMASI

Baş Prokurorluq jurnalist Əvəz Zeynallının həbsdə olan iş adamının ailəsindən 20 min manat pul tələb etməsi ilə bağlı xəbərlərə münasibət bildirib.
 
Baş Prokurorluqdan bildirilib ki, cinayət faktı haqqında mediada dərc edilmiş və səsləndirilmiş hər bir məlumat prokurorluq orqanları tərəfindən araşdırılır.
 
"Haqqın.az" saytının baş redaktoru, Əməkdar jurnalist Eynulla Fətullayev "Xural TV"nin rəhbəri Əvəz Zeynallı haqda ifşaedici məlumat yayıb.
 
Bu barədə feysbuk hesabında paylaşım edən Eynulla Fətullayev jurnalist Əvəz Zeynallının hazırda həbsdə olan "Baku Steel Company” şirkətinin sabiq rəhbəri Rasim Məmmədovu şantaj edərək, onun ailəsindən 20 min manat pul aldığını bildirib.
 
Eynulla Fətullayev bununla bağlı səs yazısını sosial şəbəkə hesabında ictimailəşdirib.
 
"Əvəz Zeynallı şantaj və hədə-qorxu yolu ilə uzun müddət ərzində "Baku Steel Company" şirkətinin keçmiş rəhbəri, biznesmen Rasim Məmmədovu "tənqidlə" təhdid edərək, iş adamının yaxınlarından 20 min manat pul alıb, sonra şərti pozub, 7 sentyabr tarixli verilişində Rasim Məmmədovu "metallurgiya sənayesinin qatili" adlandırıb. Sövdələşmənin pozulmasına etiraz etmiş iş adamının yaxınları pulu geri tələb edib", - paylaşımda qeyd olunub.

www.anews.az