400 qazi və şəhid ailəsi sanatoriyaya göndərilib

Azərbaycan həmkarlar ittifaqları istər Birinci Qarabağ müharibəsi, istərsə də Vətən müharibəsi şəhidlərinin ailələrinə, qazilərinə, veteranlarına hər zaman xüsusi qayğı ilə yanaşır, onları diqqətdə saxlayır, bütün imkanlarından istifadə edərək maddi-mənəvi dəstək olur.
 
Həmin kateqoriyadan olan şəxslərə sağlamlıqlarının bərpası və qorunması, istirahətlərinin mənalı və səmərəli keçirilməsi üçün həmkarlar ittifaqları tərəfindən istirahət mərkəzlərinə və sanatoriyalara yollayışlar da mütəmadi olaraq verilir.
 
Bu işlərin davamı olaraq Azərbaycan Həmkarlar İttifaqları Konfederasiyası (AHİK) İcraiyyə Komitəsi tərəfindən 400 nəfər qazi və şəhid ailəsi üzvünün 4 ay ərzində sanatoriya-kurort müəssisələrində müalicəsi və istirahətlərinin təşkili ilə bağlı qərar qəbul olunub.
 
Bu məqsədlə qəbul olunmuş qərara əsasən, AHİK-in büdcəsindən 357 000 manat vəsait ayrılıb və Azərbaycan Əmək və Əhalinin Sosial Müdafiəsi Nazirliyinə təqdim olunub.
 
Həmin 400 nəfər qazi və şəhid ailələri üzvlərinə yollayışlar pulsuz olaraq verilir.

www.anews.az