AXCP fəalı həbs edilib

Azərbaycan Xalq Cəbhəsi Partiyasının (AXCP) Masallı Şəhər təşkilatının fəalı Mehdi Əsədov inzibati qaydada 30 sutka müddətinə həbs olunub. Bu barədə Azərbaycan Xalq Cəbhəsi Partiyasının (AXCP)  sədr müavini Seymur Həzi  məlumat verib.

Onun sözlərinə görə , Əsədov sentyabrın 13-də öz evində polis tərəfindən saxlanılıb.

"Dünən polis şöbəsinin əməkdaşları AXCP Masallı Şəhər dayaq dəstə sədri Mehdi Əsədovun evinə gələrək əvvəlcə onun telefonunu tapıb götürüblər, sonra özünü zorla polis şöbəsinə aparıblar. Bir neçə saatdan sonra o, məhkəməyə aparılıb və İnzibati Xətalar Məcəlləsinin 535.1-ci (polisin qanuni tələbinə tabe olmamaq) maddəsi ilə təqsirli bilinərək inzibati qaydada 30 sutka müddətinə həbs olunub" , - sədr müavini bildirib.

Partiya hesab edir ki, Əsədov sosial şəbəkələrdə tənqidi nəşrlərinə görə həbs olunub.

Məsələ ilə bağlı Daxili İşlər Nazirliyindən məlumat almaq istəsək də, zənglərimizə cavab ala bilmədik.

 

Aytac Zeynalova