Həbsdən çıxan keçmiş MTN naziri ilk dəfə görüntüləndi

Naxçıvan Muxtar Respublikasının sabiq milli təhlükəsizlik naziri Vəli Ələsgərovun həbsdən çıxdıqdan sonra ilk görüntüləri yayılıb.

Bununla bağlı milli qəhrəman İbad Hüseynov öz feysbuk səhifəsində paylaşım edib. O, paylaşımda Vəli Ələsgərovla birlikdə Heydər Əliyevin məzarını ziyarət etdiklərini yazıb və Fəxri Xiyabandan fotolar paylaşıb.

General-mayor V.Ələsgərov 15 il Naxçıvan MR-in milli təhlükəsizlik naziri olub. 2016-cı ildə həbs edilib, bu ilin sentyabrında azadlığa buraxılıb.

Vəli Ələsgərov ziyarət zamanı "tns.az" saytına açıqlama verib. O, həbsi ilə bağlı bunları deyib: "Bu barədə geniş danışmaq istəmirəm. Zamanla kimin kim olduğu ortaya çıxacaq. Kimin haqlı, kimin haqsız olduğu bilinəcək. Mən hər zaman Azərbaycan dövlətinin maraqlarını hər şeydən üstün tutmuşam. Bir daha deyirəm, zamanla hər şey aydın olacaq”.(qafqazinfo)

www.anews.az