Qarabağ ermənilərinin hüquqları qorunacaq - Azərbaycan Prezidenti

 

O bildirib ki, Azərbaycan artıq reinteqrasiya ilə bağlı öz baxışını təqdim edib.

"Biz rəsmi şəkildə bildiririk ki, Qarabağın erməni əhalisinin hüquqları və təhlükəsizliyi qorunacaq. Artıq Qarabağın erməni icmasına onların dini, təhsil, mədəni, bələdiyyə və bütün digər hüquqlarına hörməti əhatə edən reinteqrasiya baxışımızı təqdim etmişik. Azərbaycanın Konstitusiyasına və beynəlxalq öhdəliklərinə uyğun olaraq imzaladığı beynəlxalq konvensiyalarda öz əksini tapıb”, - Azərbaycan lideri Zəngilanda açılan II Milli Şəhərsalma Forumunda çıxışı zamanı bildirib.

 

Sentyabrın 23-də Daxili İşlər Nazirliyinin mətbuat xidmətinin rəhbəri, polis polkovnik-leytenantı Elşad Hacıyev jurnalistlərə açıqlamasında Qarabağda yaşayan erməni əsilli sakinlərin Azərbaycan Respublikasının Konstitusiyasına uyğun olaraq vətəndaşlıq məsələlərinə baxılması, onların pasportlaşdırılması, şəxsiyyət vəsiqələri ilə təmin edilməsi işinin diqqətdə saxlandığını deyib.

 

Azərbaycan tərəfi reinteqrasiya ilə bağlı rəsmi saytı yaradıb. Qarabağda yaşayan ermənilər qeydiyyatdan keçməklə reinteqrasiya üçün müraciət edə biləcəklər. 

Sentyabrın 19-da Qarabağda yerli antiterror tədbirlərinə başlanılıb və Rəsmi Bakı erməni hərbçilərinin bölgədən çıxarılmasını tələb edib. İrəvan Qarabağda erməni silahlı qüvvələrinin olmadığını bəyan edib və baş verənləri "genişmiqyaslı təcavüz” adlandırıb. Sentyabrın 20-də Azərbaycan Müdafiə Nazirliyi Rusiyanın sülhməramlı kontingentinin iştirakı ilə Qarabağda antiterror tədbirlərinin dayandırılması ilə bağlı razılığın əldə olunduğunu açıqlayıb. 

 

Qondarma rejim yanvarın 1-dən özünü buraxması ilə bağlı qərar qəbul edib. 

 

Gülnar Nazimqızı