Füzulidə traktor minaya düşüb

 

"Dekabrın 7-də saat 10 radələrində Füzuli rayonu Horadiz kəndi ərazisində təsərrüfat sahəsində əkin işləri aparan traktorun minaya düşməsi ilə bağlı polisə məlumat daxil olub. Traktorun sürücüsü 1994-cü il təvəllüdlü Həsənli Zamin xəsarət alıb. O, polis əməkdaşlarının köməyi ilə ərazidən çıxarılaraq xəstəxanaya təxliyə edilib. Faktla bağlı araşdırma aparılır", - məlumatda deyilir. 

 

Baş Prokurorluq Füzuli rayonu Horadiz kəndi ərazisində mina partlayışı ilə bağlı araşdırma aparır.

 

Bundan əvvəl, oktyabrın 26-da Tərtərin Talış kəndinə əkin işləri aparan traktor minaya düşüb və nəticədə traktorun sürücüsü xəsarət alıb. 

 

Həmçinin sentyabrın 22-də Şuşanın Xələfli kəndində mina partlaması nəticəsində traktor sürücüsü yaralanıb. 

 

2020-ci ilin noyabrından Azərbaycanda 338 nəfər mina qurbanı olub. 

 

Ümumilikdə bu dövr ərzində  aparılan minatəmizləmə əməliyyatları nəticəsində 114 400.9 hektar ərazi minalardan və müharibənin partlayıcı qalıqlarından təmizlənib.

 

Oktyabrın 1-də Milli Məclisdə keçirilən Beynəlxalq Astronavtika Federasiyasının (IAF) Nazirlər və parlament üzvləri üçün (MMOP) 13-cü beynəlxalq toplantısında millət vəkili Vüqar Bayramov təklif edib ki, Qarabağda minaların təmizlənməsində kosmos texnologiyaların istifadə olunsun.
 
Qarabağ və Şərqi Zəngəzur ərazisinin böyük hissəsi bu torpaqların işğalı zamanı erməni hərbçiləri tərəfindən minalanıb. Rəsmi Bakının apardığı bir sıra tədbirlər nəticəsində Ermənistandan  bir sıra rayonların minalanmış sahələrinin xəritələri alınıb. Lakin onların dəqiqliyi cəmi 25% təşkil edib. 
 
Bu ilin martın 17-də baş nazir Əli Əsədov Milli Məclisdə hökumətin hesabatında çıxışında bildirib ki, hazırda Qarabağda minaların təmizlənməsinə 4 özəl şirkət də cəlb olunub. Bundan əlavə, ANAMA ilə birgə Müdafiə Nazirliyi, Fövqəladə Hallar Nazirliyi, Dövlət Sərhəd Xidməti də ərazilərin təmizlənməsində iştirak edir.

 

Gülnar Nazimqızı