“28 May” stansiyasında eskalator təmir ediləcək
30.05.2024 13:24
İyunun 3-də "28 May” stansiyasının ikinci çıxışında 2010-cu ildən istismarda olan "ET-3M” tipli üç eskalatordan biri əsaslı təmirə dayandırılır. Bu barədə "Bakı Metropoliteni”ndən məlumat verilib.
Bildirilib ki, "Bakı Metropoliteni” QSC-nin əsaslı təmir planına uyğun olaraq texniki tələblərə görə, bu tip eskalatorlar 150 min km qaçış məsafəsini qət etdikdən sonra əsaslı təmirə dayandırılır.
"Təmirlə əlaqədar eskalator qovşaq və hissələrinin təmiri üçün lazım olan mal-material, ehtiyat hissələri, tərtibat və alətlərlə təmin edilib. Təmir müddətində qaynaq işləri yalnız gecə növbəsində nəzarət altında yerinə yetiriləcək.
Təmir dövründə ilk olaraq sürahi elementlərinin söküntüsünü aparmaq üçün lent zolağının daraqdan darağa olan 71 metrlik hissəsindəki 392 pillə demontaj edilərək təftiş olunacaq. Təmir dövründə eskalatorun dartı zənciri, əyləc sisteminin elementləri, reduktor və mühərrik çıxarılaraq müayinə ediləcək.
Sonrakı mərhələdə markşeyderlər qrupu eskalatorda fermaların çökmə, mərkəzdən qaçma və digər parametrlərini ölçəcək. Təmir müddətində istismar müddəti başa çatmayan və yararlı hissələr təftiş edilməklə yenidən quraşdırılacaq. Texniki şərtlərin tələblərinə, habelə dəyişdirilməsi zəruri olan hissə və qovşaqlar ölçü və standartlara uyğun yeniləri ilə əvəz olunacaq. Təmir başa çatdırıldıqdan sonra diaqnostik müayinələr aparılacaq.
Təmir yeni tədris mövsümünə qədər başa çatdırılmalıdır. Həmçinin digər iki eskalatorun iş rejimi və daim nəzarət altında olması təmin ediləcək", - məlumatda qeyd olunub.
Bu tip eskalatorların istismar müddəti 40 ildir.
www.anews.az
Twitter
Bizi Twitterdə izləyin
Foto
Video
