İbrahimzadə: Şəhid və qazi ailələrindən iştirak üçün ödəniş alınmır

Beynəxalq olimpiadalarda iştirak edən şagirdlər üçün dövlət və alternativ maliyyələşmə modelləri mövcuddur. Bunu Beynəlxalq Olimpiada Mərkəzinin direktoru Xəyal İbrahimzadə anews.az-ın sualını cavablandırarkən deyib. 

 Onun sözlərinə görə, bəzi yarışlarda iştirak Təhsil İnstitutu tərəfindən maliyyələşdirilsə də, digər hallarda valideynlər övladlarının inkişafına özləri investisiya yatırırlar.

“Təhsil İnstitutu vasitəsilə gedən yarışlar dövlət tərəfindən maliyyələşdirilir, lakin bu sistemdə də kommersiya elementləri var. Biz alternativ təqdim edirik – yəni rəsmi siyahıya düşməyən uşaqlar üçün də seçim imkanı veririk,” –  İbrahimzadə qeyd edib.

O əlavə edib ki, Mərkəz şəhid və qazi ailələrindən iştirak üçün heç bir ödəniş tələb etmir. Sosial vəziyyəti çətin olan uşaqlar isə müxtəlif yerli və humanitar şirkətlərin dəstəyi ilə prosesə cəlb olunur.

"İmkanları normal olan valideynlər övladlarının gələcəyinə sərmayə yatırır. Bu da bir seçimdir və bu yanaşma ilə övladlarının təhsilinə töhfə verirlər," – o bildirib.

İbrahimzadə bəzi təhsil ekspertlərinin beynəlxalq olimpiadalarla bağlı yanlış təsəvvürə malik olduğunu da deyib.

“Onlar beynəlxalq yarışlar ilə idman yarışlarını qarışdırır və nəticələrə qızıl, gümüş, bürünc prizmasından yanaşırlar. Halbuki, bu yarışlar akademik potensial və gələcək universitet qəbul prosesində mühüm rol oynayır,” – o əlavə edib.

İbrahimzadəyə görə, xüsusilə aşağı siniflərdə keçirilən beynəlxalq olimpiadalar motivasiya xarakteri daşıyır və şagirdlərin özünəinamını artırır.

“Məsələ yalnız nəticədə deyil – burada məqsəd şagirdə akademik bacarıq qazandırmaq, beynəlxalq təcrübə vermək və təhsilinə dəstək olmaqdır,” –  o vurğulayıb.

Gülnar Nazimqızı