Azərbaycanda məktəbəqədər təhsil müəssisələrinə qəbul gələn həftədən başlayır

Azərbaycanda 2025–2026-cı tədris ili üçün məktəbəqədər təhsil müəssisələrinə (uşaq bağçalarına) qəbul prosesi gələn həftədən başlayacaq. Bu barədə Məktəbəqədər və Ümumi Təhsil üzrə Dövlət Agentliyinin yaydığı məlumatda deyilir. 

İyulun 18-i saat 11:00-dan etibarən Regional Təhsil İdarələri və Naxçıvan Muxtar Respublikası tabeliyində olan müəssisələr üçün, iyulun 25-i isə Bakı şəhəri üzrə müəssisələr üçün elektron növbə sisteminə qeydiyyat açılacaq.

2020 və 2021-ci il təvəllüdlü uşaqlar üçün növbələr saat 11:00-da, 2022, 2023 və 2024-cü il təvəllüdlü uşaqlar üçün isə saat 15:00-da aktiv olacaq.

Valideynlər www.bq.edu.az portalı vasitəsilə elektron kabinet yaradaraq, bir uşaq üçün maksimum üç müəssisə seçə biləcəklər. Sistemə daxil edilən növbələr ən azı 5 gün sonra boş yer olduğu halda sorğuya çevriləcək. Sorğu təsdiqləndikdən sonra valideyn 7 gün ərzində sənədləri müvafiq müəssisəyə təqdim etməlidir. Əks halda sorğu ləğv ediləcək və növbə növbəti uşaq üçün aktivləşdiriləcək.

Dövlət Agentliyi əlavə edib ki, ötən il yaradılan növbə və sorğular arxivləşdirilərək valideyn kabinetinə əlavə olunub, lakin bu il üçün keçərli hesab olunmur.