Azərbaycanda ilk - Yeni KlinikadaRobotik Reabilitasiya Mərkəzi açılır

Yaxın günlərdə Azərbaycanda ilk dəfə Yeni Klinikada Robotik Reabilitasiya Mərkəzi açılacaq. Bunu TƏBİB-in İcraçı direktorunun müşaviri Pərvin Əkbərov deyib. 

Əkbərovun sözlərinə görə, mərkəzin tərkibində 30 çarpayılıq İnsult Mərkəzi, 30 çarpayılıq Neyrotravma bölməsi, həmçinin ambulator və stasionar reabilitasiya xidmətləri fəaliyyət göstərəcək.

“Mərkəzdə eksoskeletlər, yürüş analiz sistemləri, virtual reallıq (VR) texnologiyası, robotik qol-ayaq terapiyası, nevrostimulyasiya avadanlıqları və digər qabaqcıl reabilitasiya texnologiyaları tətbiq ediləcək,” –  o bildirib.

Əlavə olaraq qeyd olunub ki, mərkəzdə multidisiplinar tibbi komanda – fizioterapevtlər, reabilitoloqlar, nevroloqlar, ortopedlər, loqopedlər və psixoloqlardan ibarət olacaq. Fərdi bərpa planları və davamlı qiymətləndirmə sistemləri vasitəsilə xəstələrin reabilitasiya prosesinin effektivliyi təmin ediləcək.

Yeni mərkəz, Azərbaycanın reabilitasiya sahəsində texnoloji imkanlarının genişləndirilməsi baxımından mühüm mərhələ hesab olunur.

Gülnar Nazimqızı