O dünyada da narahat olmasın – Bankdan qazinin anasına təklif

“Bank of Baku” iki il əvvəl dəm qazından boğularaq dünyasını dəyişən Vətən müharibəsi iştirakçısı Səbuhi Məmmədovun kredit borcuna görə məhkəməyə müraciət edib. Bu barədə məlumatı mərhumun qohumları açıqlayıb.

Qohumlarının bildirdiyinə görə, Məmmədovun vəfatından sonra ailəsi onun bankdan kredit götürdüyünü və təxminən 1,000–1,200 manat borcu qaldığını öyrənib. İddia olunur ki, bank əməkdaşları mərhumun anasına borcu ödəməyi təkidlə tövsiyə edib və məsələ hazırda məhkəmə müstəvisinə keçib.

“Üstündən 2 ilə yaxın vaxt keçib, Səbuhinin anasını banka çağırıblar və deyiblər ki, oğlunun krediti var idi, onu ödəməlisən. Hətta bank əməkdaşı bir qədər də genələrək tövsiyə edib ki, “oğlunuzun borcunu ödəyin ki, o dünyada da onu inkir-minkir narahat eləməsin”. Bir sözlə, indi iş məhkəmədədir”, - qazinin anası bildirib. 

İşə 1 sentyabr 2025-ci il tarixində Şirvan Şəhər Məhkəməsində, hakim Əli İmanovun sədrliyi ilə baxılacaq.

Səbuhi Məmmədov 44 günlük Vətən müharibəsində iştirak edib və “Xocavəndin azad olunmasına görə” medalı ilə təltif olunub. O, həmçinin bir neçə dövlət qurumundan mükafatlar alıb və vəfat edənədək “Report” İnformasiya Agentliyində montajçı kimi çalışıb.

Məsələ ilə bağlı Bank of Bakuya sorğu göndərilib. 

Gülnar