95 yaşlı pasiyent üzərində yüksək riskli ortopedik əməliyyat icra edilib

Bakıdakı Respublika Klinik Xəstəxanasında 1930-cu il təvəllüdlü Savat Quliyeva üzərində yüksək riskli ortopedik əməliyyat uğurla həyata keçirilib. Pasiyent tibb müəssisəsinə sol bud sümüyünün burmalardan keçən sınığı diaqnozu ilə müraciət edib.

95 yaşlı xəstədə əməliyyata maneə törədə biləcək ürək çatışmazlığı, böyrək funksiyalarının pozulması (yüksək kreatinin), bağırsaq problemləri və qanaxma meyilliliyi kimi ciddi yanaşı xəstəliklər aşkarlanıb. Bu səbəbdən bir sıra digər tibb müəssisələri tərəfindən əməliyyata tibbi risklər səbəbilə imtina verilib.

Xəstəxananın Travmatologiya və Ortopediya şöbəsində yerləşdirilən pasiyentin vəziyyəti yenidən qiymətləndirilib və kardioloq, anestezioloq-reanimatoloq və travmatoloqdan ibarət tibbi konsiliumun qərarı ilə əməliyyatın icrasına qərar verilib.

Əməliyyat — sol bud sümüyünün osteosintezi — həkim-travmatoloq-ortoped Pərvin Hüseynovun rəhbərliyi ilə, həkim-anestezioloq-reanimatoloq Fatma Əhmədova və assistent Cavid İlyaszadənin iştirakı ilə icra olunub.

Əməliyyatdan sonra pasiyent müvafiq şöbədə müşahidə altında saxlanılıb, vəziyyəti stabil qiymətləndirildikdən sonra ambulator müalicə üçün evə buraxılıb.