Nazirlik: Azərbaycanda pensiya sisteminin maliyyə dayanıqlılığında risk müşahidə olunmur

Azərbaycanın Maliyyə Nazirliyi ölkənin fiskal sabitliyi və pensiya sisteminin ortamüddətli maliyyə dayanıqlılığı ilə bağlı risk əlamətlərinin müşahidə edilmədiyini açıqlayıb.

Nazirlik tərəfindən yayılan rəsmi məlumatda qeyd edilir ki, 2026–2029-cu illəri əhatə edən Orta Müddətli Xərclər Çərçivəsi sənədində sosial rifah məsələləri prioritet olaraq qalacaq.

“Hazırda ölkəmizdə ortamüddətli dövrdə fiskal dayanıqlıq, o cümlədən pensiya sisteminin maliyyə dayanıqlılığında vəziyyət qənaətbəxşdir və hər hansı risk əlamətləri müşahidə olunmur,” – Maliyyə Nazirliyinin açıqlamasında qeyd olunub.

Qurum bildirib ki, ənənəvi olaraq hər il olduğu kimi, cari ildə də fiskal orqan qismində ölkənin sosial-iqtisadi, humanitar və fiskal risklərini təhlil edib və bu risklərin uzunmüddətli perspektivdə idarə olunması üçün baxışlarını təqdim edir.

Nazirlik bildirir ki, hökumətin qarşısında duran əsas vəzifələrdən biri əhalinin sosial rifahının yüksəldilməsi və həyat keyfiyyətinin davamlı şəkildə yaxşılaşdırılması olacaq.

Azərbaycanın pensiya sistemi hazırda birgə maliyyələşmə və əməkhaqqı əsaslı yığım modelinə əsaslanır. Dövlət Sosial Müdafiə Fondunun illik hesabatlarına əsasən, pensiya ödənişlərinin təmin olunmasında əsas gəlir mənbəyi məcburi sosial sığorta haqlarıdır.

Aytac