Bakıda 2 tona yaxın yararsız ət aşkarlanıb, altı nəfər saxlanılıb

Daxili İşlər Nazirliyi (DİN) və Qida Təhlükəsizliyi Agentliyinin (AQTA) birgə keçirdiyi əməliyyat zamanı Bakının Nizami rayonunda fəaliyyət göstərən ət kəsimi məntəqəsində 2 tona yaxın qidaya yararsız ət məhsulu aşkarlanıb. Bu barədə DİN məlumat yayıb.

Araşdırma zamanı məlum olub ki, məntəqənin sahibi Elnur Ağayev və onunla birlikdə çalışan Habil Zülfüqarov, Rüfət Daşdəmirov, Telman Mirzəyev, Əmrah Babayev və Əhliman Məcidov xəstə və təsərrüfat üçün yararsız iribuynuzlu heyvanları ucuz qiymətə alaraq emal edib, keyfiyyətli ət adı altında satışa çıxarıblar.

Əraziyə baxış zamanı standartlara cavab verməyən təxminən 2 ton ət aşkarlanıb. Nümunələr laboratoriya analizinə göndərilib və ekspertiza nəticəsində məhsulların qida üçün yararsız olduğu təsdiqlənib.

Fakt üzrə araşdırmalar davam edir.