Oktyabrda TƏBİB-in “815” Çağrı Mərkəzinə 13 587 zəng daxil olub

Azərbaycan TƏBİB-in “815” Çağrı Mərkəzinə 2025-ci ilin oktyabrında 13 587 zəng daxil olub. Bu barədə qurum məlumat yayıb.

Daxil olan zənglərin 13 377-si dərhal cavablandırılıb, 210 müraciət isə araşdırılması üçün qəbul edilib. Vətəndaşlara 72 müraciətlə bağlı izahat verilib, 68 müraciət həll olunub, 70 müraciət isə elektron sənəd dövriyyəsi ilə aidiyyəti qurumlara yönləndirilib.

Müraciətlərin əsas mövzuları müayinə və müalicənin təşkili, əlillik məsələləri, dərman təminatı, tibbi heyət və xidmətlə bağlı şikayətlər, kadr məsələləri, eləcə də tibbi arayış və sənədlərin verilməsi olub.

Qeyd olunur ki, “815” Çağrı Mərkəzi 2022-ci ilin dekabrında fəaliyyətə başlayıb və əsas məqsəd müraciətlərin sürətli cavablandırılması və vətəndaş məmnunluğunun təmin edilməsidir.