Yanğında həlak olan komendantın səs yazısı: Zirzəmi qanunsuz satılıb, restoran saxta sənədlərlə işləyir

Noyabrın 21-də Yasamal rayonu, A.Salamzadə küçəsindəki yaşayış binasında baş verən yanğında həlak olan binanın komendantı və sakini Samir Məhəmmədovun faciədən 10 gün əvvəl etdiyi səsli müraciət yayılıb.

Samir Məhəmmədov noyabrın 11-də Bakupost.az-a müraciət edərək binanın zirzəmisinin qanunsuz satıldığı və həmin ərazidə fəaliyyət göstərən “Loft” restoranının saxta sənədlərlə işlədiyini bildirib.

“MTK binanın zirzəmisinin böyük bir hissəsini birinci mərtəbədə yerləşən obyektin sahibinə satdı. O zamandan bəri nə zirzəmimiz var, nə də qarajımız. ‘Loft’ restoranının fəaliyyəti sakinlərin dinc yaşamasına imkan vermir. Restoranın girişi yoxdur. ‘Loft Dent’ adlı klinikaya girirsən, oradan da restorana düşürsən", - səs yazısında qeyd olunub. 

Məlumata görə, Samir Məhəmmədov “Kapital Bank”da layihə meneceri kimi çalışırmış. Yanğın zamanı onun ailə üzvləri də tüstüdən zəhərlənib. 2021-ci il təvəllüdlü oğlu Məhəmməd Mikayıl və həyat yoldaşı Marta Ramazanova reanimasiya şöbəsinə yerləşdirilib və vəziyyətləri ağır olaraq qalır. Digər oğlu Danielin vəziyyəti qənaətbəxş hesab olunur.