Azərbaycanda istehlakçılara qaytarılan vəsait 300 min manatı ötüb

Azərbaycanda 2025-cü ilin 10 ayı ərzində istehlakçılara 301 min manatdan çox vəsait geri ödənilib ki, bu da ötən ilin eyni dövrü ilə müqayisədə 4,7% artım deməkdir. Bu barədə  Prezident yanında Antiinhisar və İstehlak Bazarına Nəzarət Dövlət Agentliyinin şöbə müdiri Yusif Tapdıqlı deyib. 

Onun sözlərinə görə, qaytarılan məbləğin artımı daha çox mağazalarda vitrin və kassadakı qiymətlər arasında uyğunsuzluq səbəbilə aparılan araşdırmalarla bağlıdır.

“İstehlakçı vitrində bir qiymət görür, alarkən kassada fərqli məbləğ çıxır. Araşdırmalarımız əsasən bu kimi hallar üzərində cəmlənir. Bu il 51 inzibati xəta üzrə protokol tərtib edilib, onların 90%-dən çoxu istehlakçıların aldadılması ilə bağlıdır”, – Tapdıqlı bildirib.

Agentliyə bu dövrdə 7 mindən çox istehlakçı müraciəti daxil olub. Onların təxminən 1,5 mini aidiyyəti üzrə digər dövlət qurumlarına yönləndirilib, bir hissəsi araşdırma mərhələsindədir və uyğun olmayan müraciətlər üzrə icraat dayandırılıb. Ümumilikdə baxılmış 4,8 min müraciətdən 2,1 mini təmin edilib.

Aytac