Sumqayıtda oğul anasının kartından oğurladığı pulları arvadının hesabına köçürürmüş

Sumqayıtda bir qadının bank kartından 4 244 manat vəsaitin oğurlanması faktı araşdırılır və ilkin ekspertiza hadisənin kibercinayət deyil, ailədaxili müdaxilə nəticəsində baş verdiyini göstərib. Bu barədə report məlumat yayıb. 

Bildirilib ki, mobil bank tətbiqi və kart məlumatlarına xaricdən müdaxilə əlamətləri aşkar edilməyib ki, bu da vəsaitin zərərçəkənin ailə üzvlərindən biri tərəfindən talandığı ehtimalını gücləndirib.

Aparılan əməliyyat tədbirləri nəticəsində qadının oğlu X. Əhmədov şübhəli şəxs qismində saxlanılıb. Araşdırma onun son 4 ay ərzində anasının mobil telefonundan gizli şəkildə bank tətbiqinə daxil olduğunu və hesabdakı pulu özünə və həyat yoldaşına məxsus kartlara köçürdüyünü müəyyən edib.

Faktla bağlı cinayət işi başlanıb, istintaq davam edir.