Azərbaycan və ABŞ səhiyyə sahəsində əməkdaşlığı müzakirə edib

Səhiyyə Nazirliyində ABŞ-nin Azərbaycandakı Müvəqqəti İşlər Vəkili Emi Karlon ilə görüş keçirilib. Bu barədə nazirlikdən bildirilib. 

Səhiyyə naziri Teymur Musayev görüşdə Vaşinqtonda imzalanmış Azərbaycan-ABŞ Hökumətlərarası Anlaşma Memorandumunun ikitərəfli tərəfdaşlığın yeni strateji mərhələsini formalaşdırdığını vurğulayıb.

Nazir həmçinin şəhid ailələri və müharibə veteranlarına göstərilən dövlət qayğısı, səhiyyə sisteminin rəqəmsallaşdırılması, tibb təhsili və həkimlərin təkmilləşdirilməsi sahəsində əməkdaşlığın əhəmiyyətini qeyd edib. Vətən müharibəsi nəticəsində işğaldan azad olunmuş ərazilərdə tibbi müəssisələrin yaradılması üzrə aparılan işlər barədə də məlumat verilib.

Emi Karlon Azərbaycanın bu sahədəki fəaliyyətini yüksək qiymətləndirərək ABŞ-nin dəstəyini bildirib və səhiyyə və tibb elmi sahəsində əməkdaşlığın genişləndirilməsində maraqlı olduqlarını qeyd edib. Görüş zamanı qarşılıqlı maraq doğuran digər məsələlər də müzakirə edilib.