Tramp: ABŞ ordusu Nigeriyada İŞİD-ə qarşı zərbələr endirib

ABŞ Prezidenti Donald Tramp Amerika ordusunun onun göstərişi ilə Nigeriyanın şimal-qərbində fəaliyyət göstərən İŞİD terror qruplaşmasına qarşı hava zərbələri endirdiyini açıqlayıb.

Tramp sosial şəbəkədəki paylaşımında İŞİD üzvlərini “terrorçuların ən aşağı təbəqəsi” adlandıraraq, onların uzun müddətdir əsasən günahsız xristianlara qarşı hücumlar həyata keçirdiyini və mülki şəxsləri vəhşicəsinə öldürdüyünü bildirib.

“Bu terrorçuları daha əvvəl xəbərdar etmişdim ki, əgər xristianların öldürülməsini dayandırmasalar, bunun əvəzini çox baha ödəyəcəklər. Onlar artıq bunun əvəzini ödəyiblər”, — Tramp qeyd edib.

O əlavə edib ki, Müdafiə Nazirliyi (Pentaqon) tərəfindən “yalnız ABŞ-ın həyata keçirə biləcəyi səviyyədə” dəqiq zərbələr endirilib.

Tramp paylaşımının sonunda bildirib ki, “Allah ABŞ əsgərlərini qorusun” və terrorçular hücumlarını dayandırmayacağı təqdirdə ölən İŞİD üzvlərinin sayının artacağını vurğulayıb.

ABŞ prezidenti zərbələr zamanı hansı konkret hədəflərin vurulduğunu açıqlamayıb.

Bu arada ABŞ Afrika Komandanlığı (AFRICOM) sosial mediada yaydığı açıqlamada əməliyyatların Nigeriya hakimiyyətinin tələbi əsasında həyata keçirildiyini bildirib. AFRICOM-un məlumatına görə, zərbələr nəticəsində “çoxsaylı İŞİD terrorçuları” zərərsizləşdirilib, lakin dəqiq rəqəmlər açıqlanmayıb.

Gülnar