DYP küləkli hava şəraiti ilə bağlı sürücülərə çağırış edib

Baş Dövlət Yol Polisi İdarəsi (BDYP) küləkli hava şəraiti ilə bağlı sürücülərə çağırış edib.

Nildirilib ki, idarə bayram günləri əhalinin yol hərəkətinin rahat və təhlükəsiz şəkildə təmin olunması, yol-nəqliyyat hadisələrinin qarşısının alınması və ictimai asayişin qorunması məqsədilə gücləndirilmiş rejimdə xidmət aparır. Vətəndaşlardan yol hərəkəti qaydalarına ciddi riayət etmələri, nəqliyyat vasitələrinin texniki vəziyyətini yoxlamaları və diqqətli davranmaları xahiş edilir.

Müraciətdə qeyd olunub ki, ağır hava şəraiti, o cümlədən küləkli və digər dəyişkən meteoroloji şərait yollarda çətinliklər yarada bilər. BDYPİ sürücüləri, xüsusilə qoşqulu, tentli və uzun ölçülü yük avtomobillərinin sahiblərini təhlükəsizlik tədbirlərini gücləndirməyə çağırıb.Yollarda hərəkət intensivliyinin artacağı gözlənildiyini bildirərək, sərnişindaşıma və yükdaşıma fəaliyyəti ilə məşğul olan sürücülərə səfərə çıxmazdan əvvəl vəziyyəti nəzərdən keçirməyi və yol şəraitinə uyğun sürət seçməyi tövsiyə edib. 

BDYPİ bütün hərəkət iştirakçılarını intizamlı olmağa və bayram günlərinin təhlükəsiz keçməsi üçün qaydalara əməl etməyə çağırıb.