Cəbrayılda mina partlayıb, xəsarət alan var

İşğaldan azad edilmiş Cəbrayıl rayonunun Mehdili kəndi ərazisində mina partlayışı baş verib və  humanitar minatəmizləmə əməliyyatlarına cəlb olunan bir nəfər xəsarət alıb. Bu barədə Minatəmizləmə Agentliyi (ANAMA) məlumat yayıb. 

Piyada əleyhinə mina özəl minatəmizləmə şirkətlərindən birinin əməkdaşı xidməti vəzifəsini yerinə yetirərkən partlayıb. Hadisə nəticəsində 1985-ci il təvəllüdlü Məmmədov Rəşad Nəriman oğlu ayaq nahiyəsindən yüngül xəsarətlər alıb və rayon mərkəzi xəstəxanasına təxliyə edilib.

ANAMA bildirib ki, zərərçəkənin vəziyyəti qənaətbəxşdir, həyati təhlükəsi yoxdur.

225-ci il ərzində Qarabağda 1 861 tank əleyhinə mina, 4 963 piyada əleyhinə mina və 52 392 ədəd partlamamış hərbi sursat (PHS) aşkarlanaraq zərərsizləşdirilib.

Son 4 ildə işğaldan azad olunmuş ərazilərdə ümumilikdə 175 017 mina zərərsizləşdirilib. Ümumilikdə 34 996 ədədi piyada əlehinə mina, 21 022 ədədi tank əlehinə mina, 118 999 ədədi partlamamış hərbi sursat olmaqla ümumilikdə 175 017 mina zərərsizləşdirilib. Müharibədən sonrakı dövrdə 176 237 hektar ərazi minadan təmizlənib. 
 
Dünyada mina qurbanlarının 84%-i mülki şəxslərdir. Onların da 37%-ni uşaqlar təşkil edir. Ümumilikdə isə mina qurbanlarının 81%-ni kişilər və oğlan uşaqları təşkil edir. 
 
Azərbaycanda da mina qurbanlarının sayı 3400 nəfərdən çoxdur. Onların 359 nəfərini uşaqlar təşkil edir. 38 nəfəri qadınlardır. 
 
Təkcə İkinci Qarabağ Müharibəsindən sonra mina qurbanlarının sayı 382 nəfər təşkil edib. Onların 55 nəfəri həlak olub. Minaya düşənlərin 143 nəfəri isə mülki şəxslərdir. 

Gülnar