Aliment ödəməyən şəxslər Rusiyada gizlənə bilməyəcək

Yetkinlik yaşına çatmayan uşaqlar üçün alimentin tutulmasına dair məhkəmə qərarları Müstəqil Dövlətlər Birliyi ölkələrində qarşılıqlı tanınacaq və icra olunacaq. Bu isə Azərbaycanda aliment ödəməyən şəxslərin Rusiyada məsuliyyətdən yayınmasını çətinləşdirəcək.

Rusiyanın Dövlət Duması hüquqi yardım haqqında 2002-ci il Kişinyov və 1993-cü il Minsk konvensiyalarına edilən dəyişiklikləri ratifikasiya edib.

Sənədlər yanvarın əvvəlində Rusiya prezidenti Vladimir Putin tərəfindən parlamentə təqdim olunub.

Dəyişikliklərə əsasən, alimentin tutulması ilə bağlı məhkəmə qərarının tanınması və icrası üçün iddiaçı digər MDB ölkəsinin məhkəməsinə müraciət edə biləcək.

Bunun üçün qərarın qanuni qüvvəyə mindiyini və borcluya çatdırıldığını təsdiqləyən sənədlər, həmçinin təsdiqlənmiş tərcümələr tələb olunacaq.

Kişinyov Konvensiyasına Azərbaycan, Ermənistan, Belarus, Qazaxıstan, Qırğızıstan, Rusiya, Tacikistan və Özbəkistan qoşulub. Minsk Konvensiyasının iştirakçıları sırasında Türkmənistan, Gürcüstan və Moldova da var.

N.Təbrizli