Ailə institutu təhlükə altındadır - nazir müavini

Azərbaycanda uşaqların hüquqlarının qorunması və ailə dəyərlərinin möhkəmləndirilməsi məsələsi müasir çağırışlar fonunda prioritet hesab olunur. Bunu Elm və Təhsil Nazirinin müavini Firudun Qurbanov "uşaq hüquqları haqqında" qanuna münasibət bildirərkən deyib. 

Qurbanov deyib ki, müasir dünyada uşaqların hüquqları ciddi problemlərlə üzləşir və bu sahə beynəlxalq gündəmdə həsas mövzulardan biridir. O qeyd edib ki, dünya birliyi milyonlarla uşağın yoxsulluq, müharibə və ayrı-seçkilik nəticəsində əziyyət çəkdiyini qəbul etməli və bu çağırışlara yalnız birgə səylərlə adekvat cavab vermək mümkündür.

Elm və Təhsil Nazirliyinin müavini vurğulayıb ki, informasiya texnologiyalarının sürətli inkişafı və gələcək sənaye inqilabları uşaqları yeni durumlara hazırlamağı tələb edir və buna daha çevik və adekvat sistemlə yanaşmaq lazımdır.

"Hazırda ölkədə 1 milyondan çox uşaq məktəbə gedir, lakin hər ailədə yüksək mədəniyyət formalaşdığını söyləmək mümkün deyil. Ailə dəyərləri müasir dünyada itməkdədir, ailə institutu təhlükə altındadır və Avropada belə institutun mövqeyi şübhə altına alınır. Buna görə də məqsəd uşaqların hüquqlarını qorumaqla yanaşı, ailə dəyərlərini də qoruyub saxlamaqdır", - nazir müavini bildirib. 

Beynəlxalq statistikaya görə, dünya üzrə milyonlarla uşaq yoxsulluq, zorakılıq və münaqişələrdən əziyyət çəkir. Ekspertlər hesab edir ki, təhsil sistemi, sosial müdafiə və ailə institutunun dəstəklənməsi uşaqların hüquqlarının qorunmasında əsas faktorlar sırasındadır. Azərbaycanın strategiyası da bu çağırışlara uyğun olaraq uşaqların hüquqlarının qorunması və ailə institutunun gücləndirilməsi istiqamətində tədbirləri əhatə edir.

Gülnar Nazimqızı