Ölkə ərazisində çovğun müşahidə olunur

Hazırda ölkə ərazisində mürəkkəb sinoptik proseslərin təsiri ilə hava şəraiti kəskin dəyişir. Milli Hidrometeorologiya Xidmətinin rəis müavini Gülnarə Abbasova bildirib ki, fevralın 3-ü axşamdan başlayaraq şimal-qərbdən daxil olan arktik və Sibir mənşəli soyuq hava kütlələri temperaturun kəskin enməsinə və küləyin güclənməsinə səbəb olub.

Rütubətli Aralıq dənizi siklonunun təsiri ilə ölkədə buludluluq artıb, yağış, bəzi yerlərdə isə sulu qar və qar yağır. Abşeron yarımadasında müşahidə olunan güclü şimal-qərb küləyinin maksimal sürəti 28 m/s-ə çatır və çovğun müşahidə olunur.

Abbasova əlavə edib ki, küləkli və soyuq hava şəraiti fevralın 5-i səhərədək davam edəcək. Fevralın 4-dən 5-nə keçən gecə bəzi ərazilərdə temperatur 0-dan mənfi 2 dərəcəyə enəcək, bu da yollarda buz bağlama riskini artırır. Dağlıq və dağətəyi rayonlarda isə intensiv yağıntılar yolların buz bağlamasına səbəb olacaq.