Pensiya kapitalı inflyasiyaya uyğun 5,6 % artırılıb - Deputat

Azərbaycan Prezidentinin “Əmək pensiyalarının indeksləşdirilməsi haqqında” sərəncamına əsasən, 2026-cı il yanvarın 1-dək sığortaolunanların fərdi şəxsi hesabındakı pensiya kapitalı illik inflyasiya səviyyəsinə uyğun indeksləşdirilib. Bu barədə deputat Vüqar Bayramov sosial şəbəkədə məlumat verib.

Pensiya kapitalının artırılması yalnız əmək pensiyalarını deyil, həmçinin fərdi pensiya hesablarını da əhatə edir.

Dövlət Statistika Komitəsinin məlumatına görə, 2025-ci il üzrə illik inflyasiya 5,6 % təşkil edib.

Nəticədə vətəndaşların 2026-cı il yanvarın 1-nə olan pensiya kapitalı 5,6 % artırılıb. Məsələn, 40 min manat pensiya kapitalı olan vətəndaşın hesabına 2 240 manat əlavə olunaraq ümumi məbləğ 42 240 manat olub.

Pensiya kapitalının indeksləşdirilməsi yığılan vəsaitləri inflyasiyanın mənfi təsirlərindən qorumaq üçün həyata keçirilir və vəsaitlərin real dəyərinin qorunmasını təmin edir.

Bu addım vətəndaşların gələcək pensiya təminatında inflyasiya riskini azaltmaq və sosial müdafiəni gücləndirmək məqsədini daşıyır.

Aytac