Yol polisi sürücülərə müraciət edib

Baş Dövlət Yol Polisi İdarəsi həftəsonu gözlənilən əlverişsiz hava şəraiti ilə əlaqədar sürücülərə müraciət edib.

Qurumdan verilən məlumata görə, dumanlı, çiskinli hava şəraiti, xüsusilə gecə və səhər saatlarında görünüş məsafəsini əhəmiyyətli dərəcədə azalda bilər. BDYPİ həmçinin güclü küləyin yarada biləcəyi riskləri nəzərə alaraq sürücülərə qabaqlayıcı təhlükəsizlik tədbirləri görməyi tövsiyə edib.

Müraciətdə, xüsusilə yükdaşıma fəaliyyəti ilə məşğul olan fiziki və hüquqi şəxslərin zəruri ehtiyat tədbirləri görməsinin və yol hərəkəti qaydalarına ciddi əməl etməsinin vacibliyi vurğulanıb.

BDYPİ bildirib ki, həftəsonu respublika əhəmiyyətli avtomobil yollarında hərəkət intensivliyinin artacağı gözlənilir. Qurum bölgələrə səfər edəcək sürücülərə yağışlı havada sürət həddini aşmamağı, nəqliyyat vasitələrinin texniki sazlığını yoxlamağı və imkan daxilində yola günün işıqlı vaxtında çıxmağı tövsiyə edib.