Nazir -kənd təsərrüfatı məhsullarının istehsalı 7,6 milyard manata çatıb

2025-ci ilin yekunlarına görə, Azərbaycanda 7,6 milyard manat dəyərində kənd təsərrüfatı məhsulu istehsal olunub.
Bunu kənd təsərrüfatı naziri Məcnun Məmmədov bildirib.

Nazirin sözlərinə görə, aqrar sektorun ÜDM-də payı 5,9%, qeyri-neft sektorunda isə 8,3% təşkil edib.

Məmmədov qeyd edib ki, ölkədə ərzaq istehlakının 80%-i yerli istehsal hesabına təmin olunur və bu, aqrar sektorun ərzaq təhlükəsizliyində mühüm rol oynadığını göstərir.

Nazir bildirib ki, sektordakı artımın əsas amillərindən biri dövlətin aqrar sahəyə göstərdiyi dəstəkdir.

Onun sözlərinə görə, kənd təsərrüfatı istehsalçılarına vergi güzəştləri, güzəştli maliyyə resurslarına çıxış, subsidiyalar, texnika, avadanlıq və damazlıq heyvanların güzəştli şərtlərlə verilməsi kimi dəstək mexanizmləri tətbiq olunur.

Məmmədov vurğulayıb ki, bu alətlər aqrar sektorun inkişafına və sahəyə investisiyaların artmasına təkan verir.

Gülnar Nazimqızı