GMO məhsulların sığortalanması adi əkinlərlə eyni prinsiplərə əsaslanır - FAO rəsmisi

Genetik modifikasiya olunmuş məhsullarla bağlı narahatlıqlar bəzən şişirdilir, lakin onların sığortalanması adi əkinlərdən fərqli mexanizmə əsaslanmır. Bunu FAO-nun Azərbaycandakı Tərəfdaşlıq və Əlaqələndirmə Ofisinin rəhbəri Nasar Hayat bildirib.

Onun sözlərinə görə, sığorta ödənişi üçün əsas şərt fermerin aqrotexniki qaydalara və müqavilə öhdəliklərinə əməl etməsidir.

“Əgər fermer tövsiyə olunan toxum normasından az istifadə edirsə və məhsul uğursuz olursa, bu halda sığorta ödənişi edilməyə bilər. Fermer hansı əkin materialından istifadə etdiyini, məhsula necə qulluq etdiyini və bütün zəruri qaydalara əməl etdiyini sübut etməlidir”, - Hayat qeyd edib.

O bildirib ki, GMO məhsullar bəzi xəstəliklərə qarşı daha davamlı ola bilər, lakin dolu, sel və digər təbii fəlakətlər həm GMO, həm də ənənəvi məhsullara eyni dərəcədə zərər vura bilər.

Hayatın sözlərinə görə, fermer bütün tələblərə əməl etdikdən sonra məhsul təbii fəlakət nəticəsində məhv olarsa, bu artıq sığorta hadisəsi kimi qiymətləndirilə bilər.

Gülnar Nazimqızı